تويت
منقول مع التصرف لسه الشرح هيكون شرحي ان شاء الله
احنا متفقناش على كدة مش عايزين كتب الخارجية عايزين الشرح من كلام الاستاذ
هقرا الكلام اللى فات ومش كله طبعا بانتظار الشرح من حضرتك
بالتوفيق وربنا يعينك علينا
-
احنا متفقناش على كدة مش عايزين كتب الخارجية عايزين الشرح من كلام الاستاذ
هقرا الكلام اللى فات ومش كله طبعا بانتظار الشرح من حضرتك
بالتوفيق وربنا يعينك علينا
-
مهو ده شرح زي شرحي بالظبط
وانا مرجعاه قبل ما احطه وضفت عليه
دي المقدمة
كان ممكن مقولش انه منقول بس دي للأمانة
الكلام كله يتقرأ كويس[glint]
تعليق
-
أنواع الشبكات:
عندما تصنف الشبكات فيوجد العديد من التقسيمات زي مثلا لو احنا مجموعة طلاب كدا صبيان وبنات في الجامعة وجه واحد عايز يقسمنا هو ممكن يقسمنا لصبيان وبنات أو يقسمنا حسب السكشن كل سكشن يقف في جنب أو يقسمنا حسب المستوى الدراسي الامتياز في جنب والجيد جدا في جنب وهكذا "طبعًا انا هكون مع المقبول ده لو كنت داخل في التقسيم أصلا
" وممكن يقسم الطلاب على حسب الطول الناس القصيرين قدام والطوال ورا إلى آخره من التقسيمات المهم انه يستطيع أن يقسم الطلاب بناء على العديد من المعايير وهذا هو نفس الحال في الشبكات فلدينا العديد من التقسيمات ونذكرها في إيجاز:
1- حسب الحجم
تنقسم الشبكات حسب حجم الشبكة والمساحة التي تشغلها إلى ثلاث أنواع رئيسية LAN , MAN , WAN
- LAN "local area network"
- MAN "Metropolitan area network"
فيتم توصيلهم سويًا في شبكة واحده تكون من النوع MAN.
- WAN "Wide area network"
2- حسب طريقة الاتصال بين الأجهزة
تنقسم الشبكات حسب طريقة الاتصال بين الأجهزة إلى نوعين
- Peer to Peer Networks "P2P"
وهي الشبكات التي يكون كل جهاز فيها له القدره على أن يكون كلينت أو سيرفر حسب الحاجه فلو أردت الإتصال بأي جهاز سأكون انا كلينت وهو سيرفر ولو جهاز اتصل بي سأكون انا سيرفر وهو كلينت وهذا النوع من الشبكات هو المنتشر لدينا في المنازل ويلاحظ أن كل الاتصالات داخل الشبكة تتم بشكل مباشر فلو أردت أن آخذ معلومة من جهاز آخر سآخذها منه مباشرة دون الحاجة لوسيط بيننا وأيضًا في هذا النوع من الشبكات تكون كل الأجهزة لها نفس الامكانيات أو الصلاحيات يعني كلهم زي بعض مفيش جهاز بيتحكم فيهم كلهم مثلًا ويميز النوع ده انه سهل وبسيط ومش محتاج تكاليف ولا حاجه
بس عيب النوع ده إنه ضعيف من ناحية الأمان لأن كل جهاز مسؤول عن تأمين نفسه وانا لو في شركة وعندي 20 جهاز مش هضمن إن كل واحد بيستعمل جهاز هيعرف يحميه الموضوع هيحتاج يكون في حماية مركزية كدا يكون في حد بيحمي الشبكة كلها ويتحكم فيها وكمان من العيوب ان الحصول على المعلومات بيكون صعب لأن المعلومات متوزعة على الأجهزة كلها ولو حجم الشبكة كبير هيكون مشكلة الحصول على المعلومات.
- Client-Server Networks "Server Based"
وهي الشبكات التي يكون فيها كل الأجهزة متصلة بجهاز واحد يسمى سيرفر وباقي الأجهزة كلها كلينت بحث لو تتم كل الاتصالات عن طريق السيرفر لوا يتصل جهاز بالآخر مباشرة فالسيرفر يستقبل الاتصالات من كل الشبكة ويتحكم فيها ويكون عليه الملفات المشاركة متاحة للشبكة ويقوم بمهمة تأمين وحماية الشبكة والشبكة كلها متصله به
عيب هذا النوع هو أن السيرفر سيكون مكلف لأنه لابد أن يكون ذو امكانيات جيدة ليتعامل مع جميع اتصالات الشبكة وأيضًا يوجد عيب آخر وهو مشكلة single point failure ومعناها أن السيرفر لو انقطع اتصاله عن الشبكة لسبب ما فستتوقف كل الاتصالات في الشبكة وتتوقف الشكبة كلها.
3- حسب الTransmition Media
تنقسم الشبكات حسب وسائط النقل إلى نوعين
- Wired Network
- Wireless Network
وهي الشبكات التي لا تستعمل الكابلات في التوصيل ولكن تستعمل موجات الراديو بترددات معينه وقد بدأت الشبكات الوايرليس في الانتشار وسيكون لنا حديث طويل عنها بإذن الله
4- حسب الPhysical Topology
قبل الحديث عن التقسيم ده احنا نتكلم الأول عن الTopology ايه هي أصلا؟ الTopology هي عبارة عن تمثيل أو تصميم للشبكة وهي بتتقسم لنوعين :
- الPhysical Topology
وهو عبارة عن تمثيل لشكل الأجهزة في الشبكة على الواقع يعني هما جنب بعض مثلا ولا ورا بعض ولا عاملين شكل دائرة ولا كلهم متوصلين بنقطة واحده ولا ايه النظام؟
- الLogical topology
مايهمنا هو الphysical topology وتنقسم الشبكات حسب الphysical topology إلى عدة أنواع وأشهرها
Bus Topology
وهو عبارة عن اتصال الأجهزة كلها بكابل واحد ينقل البيانات بينهم وبالطبع من الممكن حدوث تصادم بين البيانات كما تلاحظ من الصورة وأيضًا لو حدث قطع بالكابل فستتوقف معظم الأجهزة عن الاتصال ببعضها وهذا النوع تقريبًا لم يعد له وجود في هذه الأيام.
RingTopology
وهو عبارة عن اتصال الأجهزة ببعضها البعض على شكل حلقة فكل جهاز متصل بالجهاز الذي قبله والذي بعده وكأنها حلقه وهنا يوجد عيب في الشبكة وهو عند توقف الأجهزة فذلك يؤثر على الاتصال بين الأجهزة وهذا النوع أيضَا نادر الوجود.
Star Topology
هو عبارة عن اتصال الأجهزة في الشبكة كلها بنقطة واحدة وذلك يكون مثل الClient-Server Networks ولاحظ ان الفرق بين شبكات الStar والClient-server هو أن الشبكة الClient-Server
تكون فيها الشبكه كلها متصلة بجهاز كمبيوتر كنقطة التقاء أما الStar فقد تكون نقطة إلتقاء الإتصال هي عبارة عن سويتش أو أي جهاز آخر ولا يشترط أن يكون جهاز كمبيوتر وهذا النوع هو الأشهر والأكثر انتشارًا الآن.
يوجد العديد من الأنواع الأخرى ولكن اكتفينا بذكر الأشهر فقط.
لاحظ أنه في الشبكات الطبيعية لدينا يمكن أن تكون الشبكة عبارة عن خليط من الأنواع السابقة ولكن من الصعب أن تجد شبكة كاملة في هذه الأيام عبارة عن bus او ring فالأشهر هو وجود خليط بينهم أو وجود star topology.
مكونات الشبكة:
انا هتكلم هنا عن مكونات الشبكة بشكل سريع كدا وفي الدرس القادم ان شاء الله سنتحدث عنها بالتفصيل.
عايزين نفكر كدا في جواب السؤال ده ... ياترى الشبكة تتكون من ايه؟
الشبكة في أبسط صورها تتكون من ثلاث أشياء وهي:
Network Interface Card "Network Adapter"
Transmition media
Operating System
ايه معنى الكلام الي فات ده طيب؟
تخيل كدا انا هوصل جهازين اتنين فقط ببعض أعتقد دي أصغر وأبسط شبكة ممكن نعملها وستتكون من الآتي:
أولًا: الNetwork Interface card أو الNetwork Adapter هو مانسمية كارت الشبكة وهو المسؤول عن عمليه نقل البيانات من جهازك الي الشبكه والعكس ويكون متصل بالكابل الخاص بنقل البيانات.
ثانيًا: ال Transmition media وهي الوسيط المستخدم في نقل البيانات يعني هل سيتم النقل عن طريق موجات الراديو أو عن طريق كابلات.
ثالثًا: نظام التشغيل فبالطبع لو كان الجهاز بدون نظام تشغيل لن يعمل فكيف ستعمل الشبكة بدون أنظمة تشغيل على الأجهزة .. لابد من وجود أنظمة تشغيل على الجهازين.
طبعًا ده مش كل المكونات لأن لو الشبكة زادت عن جهازين هنحتاج حاجات تانيه
يعني قديمًا كان في شبكات من النوع bus او ring بتسمع بتوصيل أكثر من جهازين عادي بنفس المكونات الي فاتت بس دول قليل لما نلاقيهم الوقتي الوقتي علشان نوصل أكثر من جهازين في شبكة معينه لازم يكون في أجهزة زي سويتش وممكن لو هنوصل أكثر من شبكة مع بعض يكون في بينهم روتر ... المهم أنه هناك العديد من الأجهزة الإضافية نحتاج إليها كلما زاد الحجم في الشبكة.
الدرس القادم ان شاء الله نتحدث عن مكونات الشبكة بشيء من التفصيل لتتضح الأمور أكثر.
أرجو أن تقرأو الموضوع جيدًا وتهتموا بالأساسيات التي نطيل الحديث فيها لأن "بناء الهرم يبدأ من القاعدة وليس من القمة".
لو في أي استفسار انا موجودة باذن الله
أمان الله
[glint]
تعليق
-
جزاك الله خيرا
حتى الآن المادة هي بالنسبة لي تذكير لما درسته في علم الحاسوب
مستنيين الثقيل من المادة
تعليق
-
جزانا واياكم كل خيرجزاك الله خيرا
حتى الآن المادة هي بالنسبة لي تذكير لما درسته في علم الحاسوب
مستنيين الثقيل من المادة
كنت لسه هتتكتب غياب
طبعا المروة انا عطياها فرصة وشوية هتتسجل غياب
التقيل جاي متقلقوش[glint]
تعليق
-
ايه الجمال ده أختى : أمة الإسلام
شبكات!!! وفى المنتدى
أنا كنت بحب مادة الشبكات فى الكلية ،وجميل أن أتذكرها معكم،
لكن بدون امتحان طبعا ، لأنه تم غلق باب التسجيل : ) ، ولأنى مش غاوية امتحانات، الحمد لله خلصنا امتحانات من زمان
اقتراج مفيد جدا أخينا الكريم يا ريت فعلا تقوم به لو عندك وقت ، بارك الله فيك
-------------
أقترح أختى نقل الموضوع إلى قسم الكمبيوتر والإنترنت ،حتى تعم الفائدة
كذلك تغيير عنوانه إلى مثلا " دورة فى الشبكات" ، ولا إيه رأيكم؟
(( يُعرف الرجال بالحق
ولا يُعرف الحق بالرجال ))
تعليق
-
اللي حابب نفتح باب التسجيل تانيلكن بدون امتحان طبعا ، لأنه تم غلق باب التسجيل : ) ، ولأنى مش غاوية امتحانات، الحمد لله خلصنا امتحانات من زمان
هفكر يا جماعة وارد عليكم بجد
اللي عايز يدخل ويمتحن يقول
مفيش مشاكل[glint]
تعليق
-
[gdwl]وبالنسبة للاخ احمد خطب معانا ولا ايه[/gdwl]
أنا عتابع إن شاء الله الشرح بس مش عخش فى إى أختبارات لظروف خارجة عن إرادتى
وعلى فكرة ( أحمد الخطاب مش.. خبط)
وجزاكى الله خيراً على المجهود الواضح دهتعليق
-
جزانا واياكم كل خير اخونا الفاضل
اعتذر عن الخطأ الغير مقصود
يشرفنا متابعتك[glint]
تعليق
-
[gdwl]أقترح أختى نقل الموضوع إلى قسم الكمبيوتر والإنترنت ،حتى تعم الفائدة
كذلك تغيير عنوانه إلى مثلا " دورة فى الشبكات ولا إيه رأيكم؟[/gdwl]
وأنا شايف كده بردوتعليق
-
هو كان مجرد اقتراح في الاول ودلوقتي انا قلت اكمل في نفس الموضوع عشان الناس متتهش
الادارة ممكن تعمل اللي تشوفه مناسب لاني دلوقتي مقدرش اعدل انا اي شيء[glint]
تعليق
-
وها نحن عدنا من جديد الحمد لله
لنكمل يا اخواني المسيرة[glint]
تعليق
-
روى الإمام أحمد من حديث شداد بن أوس رضي الله عنه قال : سَمِعتُ رسول الله صلى الله عليه وسلم يقول : "إذا كَنَز الناس الذهب والفضة فاكْنِزوا هؤلاء الكلمات : اللهم إني أسألك الثبات على الأمر ، والعزيمة على الرُّشْد ، وأسألك شُكر نعمتك ، وأسألك حُسْن عبادتك ، وأسألك قلباً سليماً ، وأسألك لِساناً صادقاً ، وأسألك من خير ما تَعْلَم ، وأعوذ بك من شر ما تَعْلَم ، وأستغفرك لِما تَعْلَم إنك أنت علام الغيوب".
وفي رواية له قال : كان رسول الله صلى الله عليه وسلم يُعلّمنا كلمات ندعو بهن في صلاتنا ، أو قال : في دُبُر كل صلاة.
تعليق
-
اهلا وسهلا بيكي يا حبيبتي الغاليةحمدا لله على السلامة يا غالية ويا هلا والله بهالطلة
طمنيني عنك وعن أخبارك حبيبتي يا رب تكون كل أمورك تمام
انا الحمد لله كويسة وكله تمام[glint]
تعليق
-
اسفة ياجماعه إن درس النهارده هيكون طويل بس انا حرصت على إني أشرح وأعيد وأزيد في الكلام وإن الدرس يكون سهل ومفهوم بإذن الله والي يحس ان الموضوع طويل عليه يقرا النهارده الجزء الأول الخاص بالكابلات ويقرا الجزء الثاني الخاص بالأجهزة في أي يوم تاني ..
نكمل الآن الحديث الذي توقفنا عنده في الدرس الماضي من بداية الطريق في عالم الشبكات ...
مكونات الشبكة :
ماهي المكونات اللازمة لعمل شبكة بين أي عدد من الأجهزة؟؟ تعالوا كدا نشوف.
تتكون الشبكة بشكل عام من:
- Hosts
- Transmission media
- Networking Devices
طبعًا كلنا عارفين إن الhosts هي أجهزة الكمبيوتر ودي كل المطلوب فيها ان يكون عليها نظام تشغيل ونظام التشغيل ده يكون بيدعم الشبكات من حيث يكون عليه البروتوكولات اللازمه لتشغيل الشبكات وطبعًا ايه هو البروتوكول والكلام ده هنبقا نتكلم عنه في الدروس القادمة ان شاء الله خلينا الوقتي ندخل على الTransmission media.
Transmission Media:
هو عبارة عن الوسط المستخدم لنقل البيانات بين الأجهزة وبعضها. في عالم الشبكات ممكن الشبكة تكون معتمده على نقل البيانات في صورة موجات في الهواء أو في صورة إشارات كهربيه في أسلاك أو ممكن هنستعمل الأسلاك والموجات سوا.
تعالوا نفتكر حاجه قلناها الدرس الي فات وهي أن الشبكات تنقسم من حيث نوع الTransmission media المستخدم لنوعين : Wired , Wireless
طيب تعالوا نتكلم كدا عن الوايرلس سريعًا الأول علشان النوع التاني هنطول فيه شويه ونتكلم بالتفصيل:
شبكات الوايرلس هي شبكات لا تستعمل الأسلاك في نقل البيانات ولكن تستعمل الموجات بترددات مختلفة.
في عندنا نوع مشهور من الشبكات اللاسلكيه وهو شبكات الWi-Fi ودي الي هي شبكات الكمبيوتر الي بتستعمل الradio waves وفي أنواع تانيه زي مثلًا شبكات البلوتوث المشهورة في أجهزة الموبايل ودي ممكن نربط بيها أجهزة الكمبيوتر مع بعض وأجهزة الكمبيوتر مع الموبايل ولكنها لا تصلح أبدًا للإستعمالات الكبيرة لأن شبكات البلوتوث بطيئة جدا وإمكانياتها قليله جدًا يعني هي حاجه مناسبه للموبايل أكتر من أجهزة الكمبيوتر
طيب الوقت بقا ناخد نفس عميق كدا علشان داخلين في منطقة عايزة تركيز شويه ..
نشوف بقا النوع التاني الي هو الشبكات الwired وهي الشبكات التي تستعمل الكابلات في نقل البيانات وسنتعرض لدراسة أهم ثلاث أنواع منهم والآن استعدوا لنتعرف على أنواع الكابلات وخصائص كل منها:
1- Twisted Pair Cables
- هذا النوع من الكابلات هو الأشهر والأكثر استعمالًا في الشبكات المحلية "LAN"
- الكابل بيتكون من 8 أسلاك رفيعين متجمعين سوا في أربع أزواج من الأسلاك كل زوج بيكون عباره عن سلكين ملفوفين حوالين بعض بشكل لولبي والأسلاك التمانيه دول بيكون ليهم 8 ألوان : "أزرق","بني","برتقالي","أخضر","ابيض في أزرق","أبيض في بني","أبيض في برتقالي","أبيض في أخضر" وهو شبيه نوعًا ما بكابلات التليفون في الشكل الخارجي فقط.
- والكابل ده في منه نوعين
واحد اسمه Shielded Twisted Pair
وواحد اسمه Unshielded Twisted Pair
وده بقا النوع الي مستعمل عندنا كلنا تقريبًا واختصاره UTP وهتلاقوه متوصل بجهاز الكمبيوتر وشكله زي ماهو في الصورة كدا
- الفرق بين الShielded Twisted Pair "STP" والUnshielded Twisted Pair "UTP" هو ان النوع الأول بيكون فيه طبقة بتغلف كل زوج من الأسلاك علشان يزيد من حماية الإشاره من حدوث تداخل مع أي موجات أخرى تشوش عليها ولكنه يكون أغلى في السعر ومش مرن زي النوع التاني ولذلك الأشهر في الاستعمال هو الUTP.
- بالنسبة للخصائص عندنا مثلًا أقصى طول للكابل هو 100 متر بين أي جهازين في الشبكة وبعد كدا لو حابب تزود المسافه يبقا تستعمل أجهزة لتقوية الاشارة زي Repeater , Hub , Bridge , Switch وكل الأجهزة دي هنتكلم عنها إن شاء الله النهارده ونفهمها كويس
- ممكن في أنواع من الأسلاك تمشي لمسافه أكبر من 100 متر مثلًا ممكن حد يوصل 150 ويقولي مانا عندي الشبكه تمام أهو !! هنقوله ببساطه إن ال100 متر دول حد الأمان يعني لحد 100 متر أنا ضامن إن الإشارة مش هتضعف ولا تبتدي تبوظ إنما لو طولت عن كدا مش هنضمن يعني في نوع سلك هيكون قوي ويتحمل وفي نوع هيكون ضعيف وميتحملش فالمضمون المتعارف عليه إنه 100 متر ومنزودش عنهم إلا لو استعملنا جهاز تقوية.
- بالنسبة للسرعة فاحنا دايما بنتكلم عن أقصى سرعة ممكن ينقل بها الكابل وأقصى سرعه إلى الآن تقريبًا هي 1000Mbps أو 1Gbps ودي معناها الف ميجا في الثانية فتخيل مثلا احنا بنوصل النت في مصر الي عنده اتنين ميجا الوقتي يبقا ملك .. يبقا احنا مش معنى اننا بنستعمل سلك ممكن ينقل 1000 ميجا يبقا احنا هننقل بالسرعة دي لا الصح إن دي أقصى سرعة ممكن ينقل بيها الكابل.
في حاجه مهمة عايزين نتكلم فيها الوقتي ...
- كل كابل في الدنيا سواء كان كابل نت بقا ولا كابل تلفزيون ولا أي كابل ولا حتى لو كان سلك الكهربا بتاع الراديو أي واحد في دول لازم يكون في آخره حاجه اسمها connector زي الفيشه كدا وظيفته إنه هو بيكون نهاية السلك الي بتوصله بجهاز تاني يعني المفروض الكابل يكون في الطرفين بتوعه اتنين connectors واحد داخل في جهازي وواحد داخل مثلا في جهاز واحد تاني او داخل في السويتش.
نوع الconnector المستعمل في كابلات الTwisted Pair اسمه RJ-45 Connector ودي صورته
أعتقد انه مألوف بالنسبه لمعظمنا لأن بنشوفه دايمًا واصل بالأجهزة بتاعتنا
- عايزين كمان نتكلم عن حاجه اسمها الUTP Categories وهي تصنيفات الTwisted pair cable والتصنيفات دي حاجه زي الموديلات كدا مثلا الموبايل بيكون في منه نوكيا وسوني إريكسون وسامسونج دول كلهم الشركات لكن كل شركه بقا بتنزل موديلات مختلفه يعني مش كل النوكيا موديل واحد صح؟
أهو برده مش كل الUTP بيكون Category واحد
عمومًا الcategory بتاعتنا الي بنستعملها دائمًا هي CAT5 ودي هي النوع الي عندكم في المنازل وعندي برده وعند أغلب المستخدمين وده بيتيح لنا ننقل بيانات بسرعات عالية توصل لواحد جيجا بس تصنيفات تانية بقا زي CAT1 وده بينقل بسرعة واحد ميجا كحد أقصى وأغلب استعماله بيكون في أسلاك الهاتف وفي برده CAT2 وده كان بينقل البيانات بحد أقصى 4 ميجا وده كان شغال أيام شبكات الtoken ring الي هي شبكات الRing topology واحنا اتكلمنا عن الشبكات دي الدرس الي فات وفي CAT3 بينقل البيانات بسرعة 16 ميجا كحد أقصى وفي برده CAT4 وده بينقل بسرعة 20 ميجا كحد أقصى وبرده كان مستعمل في شبكات token ring في بقا انواع حديثة ظهرت لسه قيد التطوير يعني منها CAT6 وده بيحاولوا يطوروه علشان يتيح نقل البيانات بسرعة 10 جيجا
- من أهم مميزات كابلات الTwisted pair هو سهولة تركيبها
2- Fiber Optics
ده بقا أغلى حاجه وأسرع حاجه ويستعمل في ربط الشبكات مع بعضها البعض على مسافات كبيرة جدًا وينقل البيانات بسرعة مقاربة لسرعة الضوء وهو بيكون عبارة عن اسطوانة زجاجية قابله للثني ومغلفة بمواد عازلة للحماية والنوع ده مش بيستعمله غير الشركات الكبيره أو شركات توصيل الانترنت بين المدن والدول والمسافات الشاسعة
مشكلتها هو السعر العالي جدًا وصعوبة التركيب.
3- Coaxial Cables
ده نوع من الكابلات شبه كابلات التليفزيون الي بتكون متوصلة من الدش وكدا زي ماهو باين في الصورة
وواضح إنه فيه طبقات كتير للحماية بس عيبه إنه سرعته مش كبيره زي الTwisted pair وكمان مش مرن كدا ولا سهل الثني زي النوع الي فات ولذلك استعماله قليل ومش منتشر الايام دي بس هو كان موجود أيام ماكان في bus topology وبرده بيستعمل في دول تانيه زي الولايات المتحده مثلا بيستعملوه هناك في شبكات بتعتمد على نقل البيانات في اسلاك التلفزيون وبالتالي يكون الاتصال بالانترنت مش عن طريق خط التليفون ولكن عن طريق كابلات Coaxial الي هي المخصصه للتلفزيون
- والCoaxial cable بيستعمل BNC Connector وده شكله
- وممكن الكابل الCoaxial يتوصل من جهازك لجهاز تاني مباشرة ويتركب فيه BNC من الناحيتين أو ممكن يوصل جهازك بBus Topology وذلك عن طريق توصيل الطرف الآخر الغير متصل بجهازك بBNC-T Connector كما هو موضح
- ويوجد لدينا نوعين من الCoaxial Cables وهما Thinnet و Thicknet زي ماعندنا كداUTP و STP في الTwisted pair والفرق بين الThinnet والThicknet ان الأول ده بيكون رفيع شويه وباين عليه من اسمه ولكنه مش مسموح فيه بطول كبير قد المسموح بيه في الThicknet يعني الThicknet مسموح فيه انك تستعمل كابل طوله 500 متر كحد أقصى وأما الThinnet فالحد الأقصى هو 185 متر.
- وأقصى سرعة بيوفرها النوع ده هي عشره ميجا انما الUTP ممكن يوفر لنا 1 جيجا.
Networking Devices:
هذه هي الأجهزة المستخدمة في الشبكات وسنقسمها في الحديث عنها لجزأين :
الأول هو كروت الشبكة والثاني هو Network Traffic Regulators
- Network Interface Card "كرت الشبكة"
هو عبارة عن كارت يوضع بكل جهاز متصل بالشبكة وهو بمثابة البوابة التي تربط جهازك بالشبكة ويكون في هذا الكارت مايسمى بالsocket أو الport وهو الفتحة التي يدخل فيها الRJ-45 Connector وكذلك يوجد لمبات تحدد اذا كان الجهاز متصل بالشبكة أم لا... طبعًا احنا ناس بندرس شبكات سوا يبقا لازم ناخد بالنا من حاجه زي كدا لو حبينا نعالج مشكله في شبكة نبص كدا على السريع نشوف في عيب في الوصلات ولا لأ من خلال اللمبة دي.
ولكل NIC في الشبكة يتم تحديد عنوانين أحدهما يسمى MAC وهو يكون موجود بشكل افتراضي من المصنع ولا يمكن تغييره إلا ببعض البرامج التي تقوم ببعض الحيل لتوهم الأجهزة في الشبكة بتغيير العنوان ولكنه لا يتم تغييره فعليًا والعنوان الآخر هو عنوان الأي بي وهذا يتم اختياره يدويًا حسب مانريد.
ولاحظ أنه لو كنا سنستعمل شبكة فيها coaxial cables أو fiber optics نوع الNIC هيتغير لأن شكل البورت الي هيدخل فيه الconnector أكيد هيتغير.
- Network Traffic Regulators
كلمة ترافيك بنسمعها كتير في الشبكات وفي الويب .. يعني ايه ترافيك؟
ترافيك يعني مرور أو كمية الأشياء المارة في مسار معين يعني العربيات الي ماشيه الشارع هنقول عليهم ترافيك والبيانات الي ماشيه في السلك برده ترافيك,, عمومًا احنا عايزين نستعمل بقا أجهزة تنظم الترافيك يعني مثلا تقوي الإشاره تخليها تمشي مسافة أكبر أو توزع الإشارة على كذا جهاز أو توصل الإشارة لجهاز معين والكلام ده كله ,,, نركز سوا بقا لأن الكلام ده مهم.
1- Repeater
الناس بتوع الشبكات زمان معجبهمش حكاية ان طول السلك يكون أقصى حاجه فيه 100 متر فقالوا لا احنا عايزين الشبكة يبقا حجمها أكبر من كدا ونوصل لأماكن أبعد من 100 متر فصنعوا الRepeater. الجهاز ده في شغله كدا عامل زي الاستراحه في الطريق بندخلها لما يكون الطريق طويل وناخد منها كل الي نحتاجه علشان نقدر نكمل السفر.. أهو ده برده عبارة عن جهاز بسيط يستعمل لتقوية الإشارة عندما يزيد طول السلك عن 100 متر لأن الإشاره تبدأ في التشوه فيقوم الجهاز بإعادة توليد الإشارة مره أخرى بشكل صحيح ,, يعني لو أنا هبعت لجهاز واحد تاني المفروض إن الإشارة هتتبعت في شكل 0,1 بس مش معنى كدا أني لو بصيت في السلك هلاقي زيرو ماشي كدا ووراه واحد
لأ طبعًا هو البيانات بتتمثل صفر وواحد لكن لما نحب نبعتها بقا الأجهزة بتتفق مع بعضها على أسلوب معين في الإرسال مثلا الأجهزة تتفق ان الواحد هو عبارة عن اشارة 5 فولت والصفر عبارة عن إني مش هبعت أي إشارة فكدا السلك هيمشي فيه البيانات على شكل خمسة فولت وصفر فولت وتفضل البيانات ماشيه تمام والجهاز المستقبل يجي له 5 فولت يعرف ان ده واحد ويجي له صفر يعرف ان ده صفر ويفضل كدا لحد مالبيانات كلها توصل بسلام
نفترض إن السلك زاد طوله عن 100 متر المفروض ايه الي يحصل؟ الإشاره هتتضعف و طبعًا الزيرو فولت ده هيفضل زيرو ماهو اصلا مفيش اشارة خالص انما بقا الخمسه فولت لما يضعفوا هيبقوا مثلا تلاته ولا اتنين ولا اي كلام من ده وتفضل الإشارة تضعف لحد مالبيانات تضيع.
احنا بقا كل 100 متر هنحط repeater ياخد الإشارة يعيد تقويتها ويخليها زي ماكانت خارجة من المصدر بالظبط يعني بيعمل عملية Regeneration وغلط نقول انه بيعملAmplify لأنه مش بيكبر الإشارة ده بيعيد توليدها من الأول علشان تكون مظبوطه تمام زي ماكانت خارجه من المصدر ويعيد إرسالها بقا في الكابل تكمل طريقها.
2- Hub
برده مصممين الشبكات قالوا الوقتي احنا لما نيجي نوصل اكتر من جهاز مع بعض عايزين نقطه معينه نوصل الأجهزة كلها بيها وهي تربطهم ببعض وتبقا زي شبكة ال star topologyفصنعوا جهاز اسمه الhub والجهاز ده بقا عامل بالظبط زي مشترك الكهربا كدا الي بنوصل بيه اكتر من جهاز على نفس المصدر أهو ده برده جهاز بيسمح لنا نوصل أكثر من جهاز سوا عن طريق توصيل كل الأجهزة بيه فهو أول متجي له اشارة من جهاز معين يروح باعتها لكل الأجهزة التانيه المتوصله بيه والمفروض ان كلهم لما بيلاقوا الرساله مش ليهم بيعملوا لها Drop والجهاز الي هي مخصصه له هياخدها ويتعامل معاها... زيادة على الوظايف دي الجهاز ده كمان ممكن يقوم بوظيفة الrepeater وهي انه يعيد توليد الإشارة بحيث نقدر نوصل جهاز بيه على بعد 100 متر وجهاز من الناحيه التانيه على بعد 100 متر تانيين وفي الحالة دي بنسميه Active hub لما لو مش هيعمل تقوية الإشارة هيبقا passive hub كل وظيفته هي انه بيربط اكتر من جهاز سوا بس.
عمومًا الpassive hub ده نادر لما نلاقيه الوقتي لأن أصلًا الhub بكل امكانياته رخيص.
فممكن نعتبر كل الي موجودين بيعملوا تقوية للإشارة بس انا قلت نعرف المصطلحات لا أكثر لأن أكتر حاجه في الشبكات هي المصطلحات.
لاحظ : hub is a multiport repeater
يعني هو شغله زي الrepeater بالظبط بس الفرق انه هو له أكثر من بورت علشان يبقا نقطة وصل لكل الأجهزة سوا.
الوقتي ميزة الhub الي ممكن تخلي حد يفكر يستعمله حاليًا هي انه رخيص فقط لأن الأجهزة التانيه هنتكلم عنها الوقتي وهيظهر انها أحسن منه بكتير.
الhub طريقة شغله فيها عيب كبير وهو عملية الBroadcast ... طيب ايه Broadcast ده؟
الوقتي لما يكون متوصل بالhub 4 أجهزة وواحد منهم بعت رسالة لجهاز تاني الرسالة هتروح للhub والhub بيربط الأجهزة ببعض بس لكن معندوش تمييز بقا مين الي بعت الرساله ولا هيبعتها لمين هو بيقوم واخد الرسالة وباعتها لكل الأجهزة المتوصلة بيه ماعدا الجهاز الي بعتها ودي هي مشكلة الBroadcast,, طيب ايه المشكلة في الموضوع ده!!
- الوقتي موضوع الBroadcast ده له مشكلتين:
1- حكاية اني ابعت لكل الأجهزة دي بتسبب حمل كبير على الأجهزة وبتستهلك السرعه في الشبكة لأن الرساله الي تمشي في كل الأسلاك دي بتشغل الأسلاك على الفاضي وتستهلك السرعة وتبطأ الدنيا.
2- موضوع الBroadcast ده بيفترض إن الأجهزة الي هتوصل لها الرساله وهي مش ليهم هيعملوا لها drop ولكن حسن النية ده مينفعش ماهو في أجهزة اصحابها نواياهم سيئة وعايزين يتجسسوا على البيانات في الشبكة فبكل بساطه مبيعملش drop للرسالة وبياخدها يقرا الي فيها ويفضل بقا يجمع كل البيانات من الشبكة ويعرف كل حاجه ولو في باسورد بتتبعت ياخدها والدنيا كلها تتسرق كدا عادي ,, العمليه دي اسمها Sniffing.
العيب التالت في الhub هو إنه شغال بنظام الhalf duplex وده نظام بطيء في نقل البيانات بيقلل من سرعة البيانات وهنشرح يعني إيه half duplex و يعني إيه full duplex بس الدرس القادم إن شاء الله.
3- Bridge
قبل منتكلم على الجهاز خلينا نتفق على حاجه ... في عندنا مصطلح في الشبكات اسمه segment وده المقصود بيه اننا نقسم الشبكة لمجموعات فكل مجموعة بنسميها segment وبيربط بين المجموعات دي bridge او hub أو أي جهاز من الي بنتكلم عنهم دول.
الBridge ده وظيفته انه بيربط اتنين segment من الشبكة ببعض يعني مثلا,, مجموعتين من الأجهزة كل مجموعة متوصلة بHub وعايزين نوصلهم سوا هنحط بينهم Bridge طيب ايه فايدته برده لما هو بيربط مجموعتين طيب منا كنت ممكن اجيب hub ولا اجيب repeater !!
لا في فرق كبير بين الجهاز ده والجهازين الي فاتوا,, الhub والrepeater دول الاتنين كدا اسمهم اجهزة غبيه يعني معندهمش اي تفكير لأنهم كل مارساله تتبعت من جهاز لجهاز بيبعتوها للشبكة كلها في عملية الBroadcast الي قلنا عليها وقلنا ان لها مشكلتين واحده منهم هيحلها لنا الrepeater وهي ان الرسالة كدا هتشغل الشبكة وتتبعت فيها كلها وده يعتبر تعطيل للكابلات على الفاضي. الbridge قال لا انا ذكي شويه انا هفصل الأجهزة في اتنين segments بحيث لو واحد من الsegment الي على اليمين عايز يبعت رسالة لجهاز تاني معاه في نفس الsegment يبقا الرساله دي هتروح للأجهزة الي في الsegment دي بس ومش هتروح للsegment الشمال خالص وبرده نفس الكلام لو واحد من الشمال هيبعت لحد من المجموعة بتاعته وبكدا نبقا احنا وفرنا شويه من الحمل ومخليناش الرساله تروح لأجهزة كتير من غير فايدة.
في كمان وظيفة بيعملها الbridge وهي إنه ممكن يربط segment شغاله بكابلات من نوع معين وsegment بتستعمل نوع آخر مثلا ممكن نربط اجهزة بتستعمل Coaxial cable مع أجهزة تانيه بتستعمل الUTP عن طريق الbridge ده أو ممكن نربط ring topology مع star topology مثلًا وهكذا.
آخر حاجه نعرفها عنه انه ممكن تستغنى عن جهاز الbridge وتحول جهاز الكمبيوتر بتاعك لbridge وهو راكب عليه نظام تشغيل سواء ويندوز ولا لينكس وهتركب في جهازك كارتين شبكة بحيث يوفر 2 بورت علشان نربط الاتنين segment سوا بيهم بس ده كلام متقدم شويه لكن أهو نبقا عارفين من باب إننا بنتعلم أساسيات.
في قاعدة مهمة عندنا في الشبكات : " أي داتا هتمشي في الشبكة من غير لزوم دي اسمها مشكله وهتسبب بطأ في الشبكة ومشاكل كتير ولازم نتخلص من الكلام ده لأن كدا عبارة عن استهلاك لسرعة الشبكة وهنبطأ الأجهزة وحاجات كتير كدا احنا في غنى عنها".
4- Switch
ده بقا هو الأذكى والأسرع في كل الأجهزة الي ذكرناها النهارده ... أولًا هو بيشكل نقطه توصيل لكل الأجهزة سوا وكمان هو بيحل المشكلتين بتوع عملية الBroadcast بحركة واحدة...
السويتش بيخزن عنده جدول فيه عنوان كل جهاز متوصل بيه والبورت بتاعه وكل مايجي له رسالة من جهاز يشوف عنوان الجهاز المرسل اليه ويفتح البورت الخاص بيه وبكدا تبقا الرساله مبتروحش غير للجهاز المخصص ليها ونمنع بقا استهلاك السرعه على الفاضي وبطأ الشبكة وكمان نمنع عملية الsniffing .
- السويتش له ميزات كتير على حسب نوعيته يعني مثلا شركة سيسكو أقوى شركه بتطلع سويتشات وروترات السويتش فيها بيكون له نظام تشغيل واعدادات وأمان وموضوع كبير يعني ومزايا كتير جدًا.
فلا مجال للمقارنه بين كل الأجهزة الي فاتت والسويتش في الامكانيات
- عمومًا البريدج معادش حد بيستعمله تقريبًا انما الي مستعمل كتير هو السويتش ولو حد بيسترخص بيجيب hub ولو حد عايز يقوي الإشارة مش أكتر بيجيب repeater.
- السويتش كمان بيسرع أداء الشبكة لأنه بيستعمل نظام الfull duplex واحنا قلنا هنتكلم عنه برده الدرس القادم
لكن بشكل عام لما يكون السرعة المسموحه للنقل في الكابلات في الشبكة عشرة ميجا السويتش بيخلي كل جهاز مسموح له بعشره ميجا لوحده كدا يلعب فيهم براحته,, إنما الhub بيقسم العشرة ميجا على الأجهزة الموجودة وده اسمه Bandwidth Sharing يعني تخيل بقا هيكون لكل جهاز مثلًا اتنين ميجا !!
من ميزات السويتش ان الhub مبيقدرش يمنع عملية حدوث التصادم بين البيانات collision ودي هنتكلم عنها برده ان شاء الله قدام لكن السويتش بقا بيمنع التصادم ده نهائيًا لو احنا موصلين على كل بورت للسويتش جهاز كمبيوتر واحد.
- السويتشات في منها أنواع كتير منها المشهور عندنا وهو LAN Switch وده الي بنستعمله في الشبكات الي عندنا كتير وفي نوع اسمه Layer3 Switch أو Multilayer switch وده بيكون عبارة عن سويتش وجواه روتر وبيكون غالي طبعًا ومش بنستعمله عندنا وفي أنواع تانيه كتير ميهمناش نتكلم عنها لأننا بندرس أساسيات حاليًا.
- بصراحه انا لو اتكلمت عن السويتشات هتكلم كتير أوي لأن أصلا نص مجال الشبكات هو السويتشات والروترات ده حتى في منهج سيسكو CCNA تلات ارباع المنهج بيكون Routing, Switching فلازم دايمًا يكون تركيزنا على السويتشات والروترات ونقرا عنها كتير لأن دول أهم جهازين في عالم الشبكات.
5- Router
الروتر ده هو أرقى جهاز في الي فاتوا طبعًا وده بقا الي بيتحمل أعباء ومجهود وذكاء وأسلوب وشغل وكل حاجه بيعملها الروتر بس غالي.
الروتر دايمًا مبنستعملوش في أي شبكة غير لو كنا هنربط الشبكة بشبكة أخرى ولو عايزين تعريف دقيق للروتر فهو جهاز يستعمل لربط أكثر من LAN مع بعض والروتر غالبًا بيربط بين شبكات بعيده جدًا عن بعض يعني شبكة في بلد وشبكة في بلد تانيه بيبربط بينهم روترات وكابلات بتسافر مسافات كبيره وكدا.
الروتر وظيفته انه بيعمل توجيه للبيانات يشوف هي هتروح فين لأنهي شبكة بالظبط وله بروتوكولات ونظام كدا معقد وحاجات محتاجه مننا نكون في مراحل متقدمه ندرسها فيها.
في حاجه مهمه عايز أقول عليها
لما أقول كلمة روتر محدش يبص على الجهاز الي عنده في البيت ده ويفتكره روتر ده اسمه ADSL Modem مش روتر أبدًا ده هو يادوب فيه امكانيات بسيطة جدًا من الروتر
عموما على السريع كدا الADSL Modem الي عندنا ده وظيفته انه هيربط الشبكة بتاعتي بشبكة الانترنت عن طريق خط التليفون, انما مينفعش أربط الشبكة بشبكة حد تاني وأعمل عملية routing والكلام ده. غير كدا كمان الروتر بيركب له نظام تشغيل وتعمل عليه سكيوريتي و routing و NAT وحاجات كتير متقدمة صعب نتكلم فيها الوقتي.
الروتر في منه موديلات كتير وامكانيات ومواصفات وسرعات وحاجات كتير كدا ويختلف سعره على حسب وظائفه
يعني في روتر مثلا سعره بيوصل ل 180 ألف جنيه تقريبًا!!
لكن أرقى الأجهزة الي اتكلمنا عليها هو الروتر والشغل عليه مجال كبير.
كدا نبقا انتهينا من الكلام عن الأجهزة الي بنستعملها في الشبكات بس انا عايز أقول على حاجه مهمة
الوظائف الي بنعملها بالسويتش بنسميها عملية الSwitching والوظائف الي بنعملها بالروتر نسميها عملية الRouting
وفي مجال كبير من تخصصات الشبكات وأغلب الناس شغالين فيه اسمه مجال الRouting, Switching فياريت ندي اهتمام كبير للروتر والسويتش ونقرا عنهم كتير.
أرجو أن تستوعبوا الموضوع جيدًا وتقرأوه أكثر من مرة
ولو في أي استفسار انا موجودة بإذن الله
في أمان الله
[glint]
تعليق
مسلمة
اكتشف المزيد حول أمةالإسلام
| المواضيع | إحصائيات | آخر مشاركة | ||
|---|---|---|---|---|
|
ردود 0
1,109 مشاهدات
0 ردود الفعل
|
بواسطة اسامة النميرى
|
||
|
ردود 0
6,694 مشاهدات
0 ردود الفعل
|
بواسطة جوهرة مصونة
|
||
|
ردود 2
1,476 مشاهدات
0 ردود الفعل
|
بواسطة الفيتوري
|
||
|
ردود 4
5,598 مشاهدات
0 ردود الفعل
|
بواسطة ظل ظليل
|
||
|
ردود 8
10,725 مشاهدات
0 ردود الفعل
|
بواسطة solema
|
||
|
ردود 24
4,280 مشاهدات
0 ردود الفعل
|
بواسطة المستعصم
|
||
|
ردود 2
1,771 مشاهدات
0 ردود الفعل
|
بواسطة زهراء
|
||
|
رد 1
220 مشاهدات
0 ردود الفعل
|
بواسطة محمد24
|
||
|
ردود 0
2,905 مشاهدات
0 ردود الفعل
|
بواسطة سيف الصحابة
|
| المواضيع | إحصائيات | آخر مشاركة | ||
|---|---|---|---|---|
|
ردود 10
8,523 مشاهدات
0 ردود الفعل
|
بواسطة سيف الكلمة
|
||
|
ردود 4
65 مشاهدات
0 ردود الفعل
|
بواسطة د. نيو
|
||
|
ردود 4
121 مشاهدات
0 ردود الفعل
|
بواسطة أحمد عبد الرحمن بدوى
|
||
|
ردود 3
2,321 مشاهدات
0 ردود الفعل
|
بواسطة محب المصطفى
|
||
|
رد 1
52 مشاهدات
0 ردود الفعل
|
بواسطة د.أمير عبدالله
|
تعليق