وخلاك زى الكتكوت اللي من غير ريش ووقع فى صفيحة ميا باردة
كسفتنا !!
الأب مخادع
امنع الكلام انت وهى
تريزا
بس شكلك بيقول انك قابلته تانى صح
الأب مخادع
وإيش عرفك ؟
تريزا
بيبقا باين على الواحد !!
وكمان المثل بيقول
القط يحب خناقه
الأب مخادع
مش خناقه ولآ حاجة ده راجل طيب زيادة عن اللزوم وما يعرفش كوز الدره من عود القصب
وبعد الدرس بتاع الاسبوع اللي فات بعد ما رجعت البيت فكرت فى نفسى وقلت الراجل اللي اسمه رمضان راجل مش سهل أبدآ وعامل نفسه إنه امى
ميرى
امك إزاى ؟
الأب مخادع
امى يعنى مبيعرفش القرأة والكتابة ياجاهلة
ومع ذلك ياولاد أحرجنى وبقيت أصب عرق
وقلت الظاهر إنه دارس جامد أوى
نبيه
دارس جامد إيه ياعمنا قصدى يابونا !!
ده تلاقيه فلاح بسيط
لآ ليه فى التور ولآ فى الطحين
ميرى
بس طلع ان ليه فى التور
وعرف يكبسه
الأب مخادع
بسيط ده عندنا احنا ياحبيبى
أصلك ما شفتش نظرة عينيه وإبتسامتة إللي كلها مكر
بسيط قال !!
صحيح إللي ما يعرفش يقول عدس
مايكل
سيبك يابونا من نبيه
واحكيلنا عملت إيه
الأب مخادع
كان لازم أروح تانى علشان شكلي كان وحش أوى قدام الواد تادرس المرة اللي فاتت لما شافنى والعرق مغرقنى
وقلت لازم أستعد جامد
التلاميذ
هيه وبعدين
نبيه
سمع هس
إحكى يا شهرزاد
ميرى
يارب يكبسك تانى
فصيح
لأ ده الواحد يقعد بقا على الأرض ويربع
تعالى ياناصح تعالى ياكيرلس تعالى يانبيه تعالي يــ
الأب مخادع
قوم ياد انت وهو كل واحد يقعد على الديسك بتاعه وبلاش قلة أدب
ناصح
ماشى بس احكيلنا بالتفصيل إيه اللي حصل بينكم بالظبط
ميرى
ومن غير كدب
الأب مخادع
هو انتوا شفتونى كدبت قبل كده
تريزا
أيوه كدبت على بتوع العربية اللي كانت عطلانة
الأب مخادع
ده ما يعتبرش كدب
لأنى كنت عاوز أمسّحهم وأخليهم مسيحيين بس طلعوا انهم مسيحيين فعلآ
هو القديس بولس مش بيقول
ان كان مجد الله يزيد بكذبى فأنا مش كذاب
بيشوى
مش كده يابونا
هى
فانه إن كان صدق الله قد إزداد بكذبي لمجده فلماذا أدان أنا بعد كخاطئ
مايكل
حتى دى لعبت فيها
شنودة
احيكلنا بقا يابونا عملت ايه مع الراجل ده
الأب مخادع
قبل مااخد بعضى واسافر قلت لنفسى الراجل ده مش سهل رغم إنه على نياته ومش حينفع معاه إلآ الخداع وقعدت أفكر طيب ياواد يا مخادع تعمل إيه تعمل إيه وتخدعه إزاى
القديس بولس بيقول
فصرت لليهود كيهودي لأربح اليهود وللذين تحت الناموس كأني تحت الناموس لأربح الذين تحت الناموس. وللذين بلا ناموس كأني بلا ناموس
يعنى فى الأول لازم أخده على أد عقله
طيب هو متعلق بحكاية الفطيرة وأكل جسد الرب ونفسه فى اللحمة
ولو طلبت منه ان ام السعد تعمل فطيرة واقوم أنا بالصلاة والتبخير وتحضير الرب وخليته بعد الإستحالة ياكل من الحمل بعد كده حيلاقى إنها برضو فطيرة وطعمها طعم الفطير يعنى مفيش تغيير
طيب أعمل إيه ساعتها واقول إيه
أقوله لأ دوق كويس
أقوله لأ انت مبتعرفش فى اللحمة
أقوله طعم جسد الرب مختلف مش زى طعم اللحمة اللي تعرفها
طيب لو قال لأ هو طعم الفطير إللي انا متعود عليه طول عمرى
أأقوله إيه ؟
ولو قاللي طيب سبنا من الطعم فين هى ريحة اللحمة أقوله إيه ؟
وبصراحة دماغى وجعنى من التفكير
قلت مابيدهاش لازم أستعين بالروح القدس اللي جوايا
فقمت أخدت كاسين نبيت معتق
ووصلت لفكرة جهنمية شيطانية
تريزا
وصلت للفكرة الشيطانية بموهبة الروح القدس !!
الأب مخادع
اسكتى
واخدين بالكم ياولاد
كان فيه عيل هدانى بحتة لحمة رحت واخد منها حتة وقعدت فردتها على الأورمة عندى فى البيت ودورتها وخلتها أد الفطيرة وقلت لخوخه مراتى خدى حطى دى فى الفرن وخليها على حالها ولما تستوى حطيها فى كيس بلاستك زى ماهي وهاتيها وفعلآ جابتها فى كيس وملفوفة فى ورقة جرنال واخدتها معاى فى العربية ورحت واخد بعضى ومسافر للواد تادرس
وطول مانا ماشى وانا بادعى الرب واقول يارب المجد ساعدنى إنى أخدع الراجل الطيب عم رمضان
بركاتك ياعدرا ساعدينى فى الملعوب ده
يابو سيفين همتك
ماتيلدا
وبتقول اسمه ليه للرب
هو الرب مش عارف اسمه
وبعدين احنا ليه بنطلب من الرب ومن العدرا
هو الرب مش بعت الروح علشان يعمل فينا
المفروض انك تطلب من الروح اللي شغال معاك
الأب مخادع
اللي حصل
ده كمان كويس ان عم رمضان لما قلتله الروح بينزل فى الزيت نسى يقولي هى مش الروح معاكم على طول وممتلئين بيها
إزاى عاوزنها تنزل فى الزيت بتاع المسحة
ميرى
لو قال كده عنده حق
فصيح
كمل يابونا كمل
خلينا فى التقيل إللي جاى ورا
الأب مخادع
وبعد لما ولادى بتوع الكفر سلموا عليا وأخدوا البركة وأخدوا مفتاح العربية وعملوا الواجب وخلصت منهم بالعافية رحت لبيت تادرس وخبطت على الباب بقلب جامد وناديت بصوت عالي
ياواد ياتادرس
انت فين ياخروف
والواد تادرس رد عليا من فوق سطح دارهم
أيوه يابونا لحظة واحدة أنا نازل أهو وبسرعة نزل وفتحلي الباب وخد البركة وقال إتفضل يامرحب يابونا إتفضل إدخل
أنا قلتله خلينا نقعد بره فى الطراوة بدل من الريحة المعفنة إللي عندك جوه وحطيت إيدى على جيبى أطمن على حتة اللحمة اللى لفتها خوخه فى كيس بلاستك علشان تفضل سخنة وإللي ريحتها بدأت تظهر والواد تادرس بقا قاعد يتلفت حواليه زى الحرامية وعاوز يعرف الريحة دى جاية منين
التلاميذ
هه وبعدين كمل
الأب مخادع
أنا قعدت بره مخصوص علشان الراجل رمضان يشوفنى واستغربت إنه ماخرجش لما سمع صوتى وأنا بنادى على الواد تادرس
ناصح
اوعى تقول إنك ملقتهوش
الأب مخادع
أتاريه كان بره
ومفيش دقايق إلا والواد تادرس بيقولي عم رمضان جاى هناك أهو هو وام السعد
بصراحة ياولاد أنا إتاخدت لما سمعت اسمه وإتخضيت غصب عنى بس علطول مسكت نفسى وحسست تانى بإيدى على حتة اللحمة إللي فى جيبى علشان أطمن
وعملت نفسى إنى مش واخد بالي وإديت ضهرى للسكة اللي جاى منها
يوه مين ده اللي انا شايفه
انا مش مصدق عينيا
معقولة خداع تانى بشحمه ولحمه
الواد تادرس قال اسمه أبونا مخادع ياعم رمضان
قلتله إزيك ياعم رمضان
قاللي خلاص خفيت . رحت الشفخانة
الواد تادرس قاله شفخانة إيه ياعم رمضان الشفخانة دى للحيوانات
عم رمضان قاله إنتوا مش بتقولوا إنكوا خرفان
أنا قلت لنفسى اثبت ياواد يامخادع هو داخل عليك سخن علشان يبرجلك ولازم تمسك نفسك
قلتله واحشنى ياراجل يا طيب
وام السعد باسم الصليب شايف ان صحتها بقت عال
قاللي صلى على النبى ربنا هو الشافى
عم رمضان قال الراجل الخروف أهو يام السعد
انا قلت خلاص رحت فى داهية يامخادع
بس الظاهر ان مراته وهى داخله الدار ماسمعتهوش
عم رمضان قال لتادرس ليه مش مقعد ابوك جوه الدار ياواد ياتادرس
لحقت انا قبل الواد تادرس مايفتح بقه وقلت
واد معفن ياعم رمضان وبيته من جوه ريحته معفنه زيه
وزى ما قلتلكم ياولاد أهم حاجة الدخلة بتاعة الواحد مهمة جدآ
قاللي علشان تادرس مربى كلب والكلب نجس وبينجس اللي حواليه ده غير الخنازير اللي جوه اللي هى أصل النجاسة
الواد تادرس المسحوب من لسانه قال إلحق يابونا عم رمضان بيقول على الكلب إنه نجس
أنا سكت ومارضتش أرد على تادرس علشان ما أفتحش سكة للراجل رمضان يتكلم فيها عن الكلب والخنزير والنجاسة وأنا مش ناقص
لقيت الواد تادرس بيقول لعم رمضان الكلب مش نجس ياعم رمضان وأبونا نفسه مربى كلب عندهم فى البيت
عم رمضان قاله يا تادرس الكلب بيفضل بره الدار مابيخشش جوه زى عندكوا وما بنخليش الكلاب تقعد تلحس فينا وتشمشم فى هدومنا علشان احنا طاهرين والكلاب بتنقض الوضوء علشان نجسة
تادرس قاله ياعم رمضان الكلاب مش نجسة ولا الخنزير نجس زى ماانت فاهم
انا قلتله يا عم رمضان ده صحيح وعندى كلبة بتنام فى الاوضه معانا عادى جدآ
قاللي وماله إنشالله تنام فى حضنك
وياترى الخنزيرة ممكن هى كمان تنام جنبك
ده لو بيحصل يبقا لازم تعدل بينهم
قلتله كلام إيه ده ياعم رمضان
قاللي وهى فارقه معاكم فى إيه مدام بتقولوا انهم مش نجسين
وكمان طول عمركم وانتوا مع بعض وبتناموا مع بعض
قلتله مين إللي مع بعض ؟
قاللي الخروف والخنزير والكلب
قلتله مش حنختلف مع بعض على النقطة دى
ده انا جاى النهاردة علشان أصالحك
وأدوقك جسد الرب
قاللي يعنى حناكل لحمة انا وام السعد
قلتله كلنا حناكل لحمة

قاللي إهيه طيب وحكاية العمودية حتعمل فيها إيه
قلتله قصدك التعميد ؟
انت مش استحميت النهاردة ؟
قاللي انا كل يوم الصبح بتسبح
وقبل مااتسبح باقول أعوذ بالله من الشيطان الرجيم
بسم الله الرحمن الرحيم
قلتله أهى تمشى على انها جحد للشيطان
قاللي إهيه فكرك كده
طيب والاعتراف
قلتله خلاص ممكن تعترفلي
قاللي أعترفلك بإيه ؟
أنا ما عملتش حاجة
قلتله اعترف بأى حاجة انت عملتها حتى لو كانت بسيطة
قاللى أنا قمت الصبح إتسبحت وكلت حتة جبنة قديمة وبعدين شربت كوباية شاى
قلتله ياعم رمضان إنا بقصد أى حاجة تغضب الرب عملتها أو فكرت فيها
قاللي ماهو لو فيه حاجة فى نيتى الرب حيكون عالمها
يعنى أنا والرب بس إللي عارفين
ليه ندخلك انت بناتنا وتعرفها
وبعدين لم أنا أعمل ذنب وربنا يستره عليا
أقوم أنا أفضح نفسى وأكشف ستر ربنا
وأروح أقولك عليه
قلتله مفيش مشكلة ياعم رمضان إعتبر نفسك إنك إعترفت
قاللي كتر خيرك العشم برضوا
ولقيته بيقول للواد تادرس
مبروك ياواد ياتادرس انت دابح حاجة لابوك ولا إيه
ريحة اللحمة المشوية ظهرت أهى
لما سمعت كده ركبى ضربت فى بعض وقلت الخطة حتبوظ
أنا كنت عاوز ريحة اللحمة تتطلع وانا بأعزم على الفطيرة إللي أم السعد لسه حتعملها
الواد تادرس قال ده أنا من بدرى ياعم رمضان وأنا نفسى أعرف الريحة دى جاية من فين
عم رمضان قال إهيه يعنى الريحة دى مش من عندك ياتادرس
الواد الملعون تادرس قال لآ ياعم رمضان يارب أعدم أبويا إن كانت الريحة دى من عندى
الراجل المكار عم رمضان قال
عجيبة ان الريحة دى ظهرت لما أبوك قال إنه حيدوقنى جسد الرب بتاعكم
قلتله انت بس إتخيلت إنك شامم ريحة اللحمة لما جت السيرة وقلتلك إنك حتدوق جسد الرب
الواد تادرس الغبى قال
أنا شامم الريحة دى من أول ما وصل أبونا حدانا
انا قلت فى نفسى لأ بقا إلحق نفسك يامخادع بدل ما تتفقس
وإبدأ نفذ الملعوب
قلتله ياريت ياعم رمضان تخلي الست أم السعد تعجن عجينة علشان نعملها فطيرة بس بسرعة اعمل معروف
قاللي من عينيا الاتنين فرُيَرة أٌقول لام السعد
الوله تادرس قال وتجهز المنئد والبخور وحتة صاجة
عم رمضان قال أيوه اومال إيه
انا قلتله حضر الحاجات دى ياعم رمضان عقبال ماادخل دورة الميا عند الواد تادرس
قاللي تعالي حدانا عندنا نضافة مش زى الواد تادرس
انا قلت أخش دورة الميا أعمل صلاة خاصة وكمان أطلع حتة اللحمة من الكيس اللي ملفوف فى ورقة الجرنال وأحضرها بعيد عنه و بعيد عن الواد تادرس
ولما دخلت جوه الحمام وطلعتها لقتها كشت أوى من النار لما استوت وبقت صغيرة
طيب إيه العمل
فضلت أدعى الرب وأنا فى دورة الميا وأتوسل للعدرا إنهم يساعدونى وتقريبآ الراجل رمضان سمع صوتي لأنه خبط على الباب
وقاللي الميا عندك فى الحنفية
أنا قلتله أنا عارف ياعم رمضان كتر خيرك
قاللي أصل أنا افتكرتك بتقول
ماء ماء
قلت يمكن انت بتسئل عن الميا
شوفتوا ياولاد الراجل المكارعلشان مفيش حد فيكم يقولي ده راجل فلاح بسيط وعلى نياته
ده راجل حويط وكمان دارس جامد