تويت
(( أنا بانقش صورتك ))
,,,
,,,
أنا بانقش صورتك
وباسجل رسمك
على كل حاجة ف دنيتى
على ضحكتى
على دمعتى
على حلم عدى من زمان
وحلم نفسى لسه يبقاله مكان
أنا بانقش صورتك
أنا با نقش صورتك
على صرخة أختى يوم ماشافت ضل عفريت فى الظلام
على فرحة أمى يوم ما باض جوز الحمام
على الحيطان فى ضي قندل المسا
وعلى القلوب فى الدار ببعضها متونسه
على كل لقمه كلتها وكل لقمه ما كلتهاش
على وش اخويا يوم ماجه
وسيرة ابويا يوم ماجاش
أنا بانقش صورتك
أنا بانقش صورتك
وباسجل رسمك
على مزق فى جلباب بيمرق ع الجسور
على ضلمه تتخانق معاها بواقى نور
على صوت بكا مخنوق فى دوامة ندم
على دمعه فى مرايه مشرّخها القدم
على لحن يترقرق فى أمواج الأدان
على جعجعة ابن الجيران
على قشرة برتقان
انا بانقش صورتك
أنا بانقش صورتك
على جذع جميزة البلد
على رسم فوق صدغ الولد
ع الحنه فى كفوف البنات
وعلى حنين الأمهات
على جسر ماشى جنب ترعتنا الوسيعه
ع الجدة تضحك للرضيعة
على كل حاجه شفتها
وكل حاجه ماشفتهاش
أنا بانقش صورتك
أنا بانقش صورتك
وباسجل رسمك
وباحبك
يا أغلى معانى الدنيا
يا حرية
يا حرية
.....
هذةة القصيدةة كتبها الدكتور أحمد ابو حاب رحمه الله أعتبره والدي
وكل من عرفه يعتبره أباً له
مدينةة له بالكثير
ومدين له كل من عرفه
وارجو من كل من يقرأها ان يدعي
للدكتور أحمد أبو رحاب بالمغفرةة وأن يدخله الله فسيح جناته
رحمك الله والدي أحمد ابو رحاب
